திருச்சி மாவட்டம், தொட்டியத்தில் பிரசித்தி பெற்ற மதுரகாளியம்மன் கோயில் அமைந்துள்ளது. இந்த கோயிலுக்கு தொட்டியம் மட்டுமல்லாமல் பிற ஊர்களில் இருந்தும் ஏராளமான பக்தர்கள் வந்து அம்மனை தரிசித்து செல்கிறார்கள். அம்மனுக்கு தினசரி அலங்காரம் நடைபெறுவது வழக்கம். 15 பவுன் மதிப்பில் மாங்கல்யம், கருகமணி, தாலிக்குண்டு, தாலிக்காசு உள்ளிட்ட பொருட்கள் அணிவிக்கப்படும். இந்த நிலையில் கடந்த 11-ம் தேதி ஒரு கைக்குழந்தையுடன் வந்த கணவன், மனைவி அம்மன் சன்னதியில் அமர்ந்து கும்பிட்டுள்ளனர்.
கோயில் பூசாரி அம்மனுக்கு பொங்கல் வைப்பதற்காக மடப்பள்ளிக்கு சென்ற சமயத்தில் அம்மன் கழுத்தில் அணிவிக்கப்பட்டிருந்த தாலிச் சங்கிலியை திருடிக் கொண்டு அவர்கள் காரில் ஏறி தப்பிச் சென்றனர். தொட்டியம் காவல் நிலையம் மடப்பள்ளிக்குச் சென்று திரும்பிய பூசாரி, அம்மன் கழுத்தில் இருந்த மாங்கல்யத்தை காணாமல் பதறினார். இது குறித்து தொட்டியம் காவல் நிலையத்தில் உடனடியாக புகார் அளித்தார். தொட்டியம் போலீஸ் இன்ஸ்பெக்டர் முத்தையா தலைமையிலான போலீஸார் தீவிர புலன் விசாரணை மேற்கொண்டு வந்தனர். கோயில் வளாகத்தில் வைக்கப்பட்டிருந்த சிசிடிவி கேமரா காட்சிகளில் தம்பதி சங்கிலியை எடுத்துக்கொண்டு செல்வது பதிவாகி இருந்தது. அந்த காட்சிகளின் அடிப்படையில் குற்றவாளிகள் கைது செய்யப்பட்டனர்.
அவர்களிடம் மேற்கொண்ட விசாரணையில், கரூர் மாவட்டம் திருக்காம்புலியூர் பகவதி அம்மன் கோயில் தெருவைச் சேர்ந்த மதுரை வீரன் என்பவரது மகன் சிவசுப்பிரமணியன் என்பதும், இவரது மனைவி நித்யா ( 27) ஆகிய இருவரும் சேர்ந்து கோயிலுக்கு சாமி கும்பிடுவது போல வந்து நடித்து நகையை திருடிச் சென்றதை ஒப்புக்கொண்டனர். இதையடுத்து உருக்கி கட்டி தங்கமாக மாற்றி வைத்திருந்த தாலிச் சங்கிலியை பறிமுதல் செய்த போலீஸார், கார் மற்றும் செல்போன் ஒன்றையும் பறிமுதல் செய்தனர். இந்த சம்பவம் திருச்சியில் பெரும் பரபரப்பை ஏற்படுத்தியது