சிறுவாணி அணை கேரளா மாநிலம் பாலக்காடு மாவட்டத்தில், பாலக்காட்டில் இருந்து 46 கி.மீ தொலைவிலும், தமிழ்நாட்டின் கோயமுத்தூர் நகரில் இருந்து மேற்கே 35 கிமீ தொலைவில் வெள்ளியங்கிரி மலை மற்றும் அதன் தொடர்ச்சியான சிறுவாணி மலையின் மேற்குச் சரிவில் சிறுவாணி ஆற்றில் அமைந்து உள்ளது. சிறுவாணி ஆறானது மேற்குத் தொடர்ச்சி மலையின் சிறுவாணி மலையின் மேற்குச் சரிவில் உருவாகி வடக்கு நோக்கி பாய்ந்து பவானி ஆற்றில் கலக்கிறது. ஆங்கிலேய ஆட்சியின் போது 1890 களில் கோவை நகரின் குடிநீர் தேவைக்காக சிறுவாணியின் குறுக்கே அணை கட்டி நீர் கொண்டு வர திட்டமிடப்பட்டது. 1920 ல் பாம்பாறு, பட்டியாறு, முத்திக்குளம் அருவியின் நீர் ஆகியவை ஒன்று சேர்ந்து சிறுவாணி ஆறு உருவாகும் பகுதியில் ஒரு சிறிய அணை கட்டப்பட்டு நீர் தேக்கப்பட்டு, மலையைக் குடைந்து 1.6 கி.மீ நீளத்துக்கு குகை அமைத்து மலையைத் தாண்டி கிழக்காக நீர் கொண்டு வரப்பட்டது. 1970 களில் கோவை நகரின் அதிகரித்த நீர்த் தேவையை நிறைவேற்ற, தமிழ்நாடு அரசு கேரளத்துடன் ஒப்பந்தம் செய்து பழைய அணைக்கு கீழ்ப் பகுதியில் பெரியதாக தற்போது உள்ள சிறுவாணி அணை கட்டப்பட்டது.
பழைய அணை தற்போதைய நீர்த் தேக்கப் பகுதிக்குள் அமைந்து உள்ளது. முல்லைப் பெரியாறு அணைத் திட்டம், பரம்பிக்குளம் ஆழியாறு திட்டம் போலவே, இத்திட்டம் மூலம் கேரளத்தின் மேற்குத் தொடர்ச்சி மலையின் மேற்குச் சரிவில் பெய்யும் அதிக மழையின் மூலம் கிடைக்கும் நீர் அணை மூலம் தேக்கப்பட்டு, குறைந்த மழை பொழியும் கிழக்குச் சரிவுப் பகுதியில் அமைந்து உள்ள தமிழ்நாட்டுக்கு கொண்டு வரப்படுகிறது. இந்த அணையைச் சுற்றியும் பாதுகாக்கப்பட்ட வனப் பகுதியாகவும் குடியிருப்புகள் இன்றியும் உள்ளதால் நீர் மிகவும் தூய்மையாக உள்ளது. ஆண்டு முழுவதும் நீரோட்டம் உள்ள முத்திக்குளம் அருவியில் இருந்தே அதிக நீர் கிடைக்கிறது. இந்த அணையும் அருவியும் மிகவும் எழில் வாய்ந்த பகுதியில் அமைந்து உள்ளது. பாதுகாக்கப்பட்ட வனப்பகுதியில் உள்ளதால் அணைக்கு பொதுமக்கள் செல்வதற்கு வனத்துறை அனுமதி பெற வேண்டும்.
வெள்ளியங்கிரி மலையின் முகட்டில் இருந்து நோக்கினால் சிறுவாணி மலைக்கு மேற்கே கல்லடிக் கூடம் மலையில் இருந்து வடக்கு நோக்கி விழும் அழகிய முத்திக்குளம் அருவியை காணலாம். வெள்ளியங்கிரி மலையில் இருந்து பார்க்கும் போது முத்திக்குளம் அருவியில் ஆண்டு முழுவதும் நீர் வருவது தெரிந்ததால் தான் அங்கிருந்து நீர் கொண்டு வர சிறுவாணி அணை திட்டம் உருவாக்கப்பட்டது.
உலகில் மிக சுவையான தூய்மையான குடிநீர் மூலங்களில் ஒன்றாகும். கேரளாவின் பாலக்காடு மாவட்டம் மன்னார்காடு வட்டத்தில் உள்ள அட்டப்பாடி பள்ளத் தாக்கில் இந்த ஆறு துவங்குகிறது. இது பவானி ஆற்றின் துணை நதியாகும். இந்நதி ஈரோடு மாவட்டம் சத்தியமங்கலத்தில் நுழையும் போது குண்டாற்றுடன் சேருகிறது.
கோவை நகரின் குடிநீர்த் தேவைகளை நிறைவேற்ற ஆங்கிலேயர்களால் கட்டப்பட்ட சிறு நீர்த்தேக்கம், வளர்ந்து வந்த நகரின் தேவைகளை ஈடுகட்ட முடியாத நிலையில், 1969 ஆம் ஆண்டு முதல் தமிழக அரசும் கேரள அரசும் ஆய்வுகள் நடத்தி ஆகத்து 19,1973 அன்று ஓர் புதிய அணையைக் கட்ட உடன்பாடு கண்டனர். இதன்படி கோவை நகரின் “வீட்டு, சமூக மற்றும் தொழிற்சாலை பயன்பாடுகளுக்குத் தேவையான நீரைத் தேக்கிட”‘ (1300 மில்லியன் கன அடி) கேரள அரசு சிறுவாணி அணையைக் கட்டி அதற்கான கேரள மாநில நிலத்தை தமிழகத்திடம் பராமரிப்பிற்கு ஒப்படைத்தது. இந்த அணையின் இருபுறமு உள்ள வாயில்களும் முறையே தமிழக மற்றும் கேரள கட்டிட வடிவமைப்பைக் கொண்டு அழகாக விளங்குகின்றன. இது கோவை மற்றும் பாலக்காடு நகர மக்களின் விடுமுறை பயணத்தலமாக விளங்குகிறது.
சிறுவாணி நீர்வீழ்ச்சி அல்லது கோவைக் குற்றாலம் என்பது சிறுவாணி நதியில் அமைந்து உள்ள ஓர் அருவியாகும். கோவையில் இருந்து 37 கிமீ தொலைவில் அடர்ந்த கானகத்தில் அமைந்து உள்ளது. இயற்கை எழிலுக்கும் தெளிவான நீரோட்டத்திற்கும் புகழ் பெற்றது. பாதுகாக்கப்பட்ட கானகப் பகுதியில் அமைந்து உள்ளதால் மாலை 5 மணிக்குப் பிறகு பயணிகளுக்கு இங்கு செல்ல அனுமதி கிடையாது.
இவ்வளவு சுவை மிகுந்த குடிநீரை தற்போது குடிநீர் வழங்குவதில் கேரளாவும் பல தடைகளை விதித்து வருகிறது. இந்நிலையில் கோவை மாநகராட்சி சிறுவாணி குடிநீருடன் மற்ற குடிநீர்கள் கலந்து வருவதால் சுவை இல்லை என்று பொதுமக்கள் குற்றம் சாட்டி வருகின்றனர்.
வரும் தலைமுறைகளுக்கு சுவை மிக்க சிறுவாணி குடிநீர் கிடைக்குமா என்பது கேள்விக்குறியாக உள்ளது.