கோவையில் வாகனங்கள் பெருகி வருவதால் நாளுக்கு நாள் போக்குவரத்து பாதிப்பு அதிகரித்து வருகிறது.இதை தடுக்க போக்குவரத்து நெரிசல் ஏற்படும் இடங்களை கண்டறிந்து, அந்த இடங்களில் வாகனங்கள் எளிதாக செல்ல ரவுண்டானா அமைக்கப்பட்டுள்ளது. இது பொது மக்கள் மத்தியில் நல்ல வரவேற்பு பெற்றுள்ளது. இந்த நிலையில் கோவை திருச்சி ரோட்டில் சிங்காநல்லூர் சிக்னலில் 4 சாலைகள் சந்திக்கின்றன. இதனால் அங்கு தினமும் ஆயிரக்கணக்கான வாகனங்கள் சென்று வருவதால் கடும் போக்குவரத்து நெரிசல் ஏற்படுகிறது . குறிப்பாக காலை ,மாலை நேரங்களில் வாகனங்கள் ஊர்ந்து செல்கின்றன .எனவே வாகன ஓட்டிகள் மிகவும் சிரமத்திற்கு ஆளாகின்றனர். போக்குவரத்து நெரிசலை குறைக்க போலீசார் நடவடிக்கை எடுத்துள்ளனர். இதுகுறித்து கோவை மாநகர போலீஸ் கமிஷனர் பாலகிருஷ்ணன் தலைமையில் போக்குவரத்து போலீஸ் துணை கமிஷனர் மதிவாணன் முன்னிலையில் சாலை பாதுகாப்பு கோட்ட பொறியாளர்கள் உதவியுடன் ஆய்வு செய்யப்பட்டது. இதை யடுத்து சிங்காநல்லூர் சிக்னலில் வாகன நெரிசல் ஏற்படுவதை தவிர்க்கும் சோதனை முயற்சியாக நேற்று முதல் போக்குவரத்து மாற்றம் செய்யப்பட்டுள்ளது.
இதுகுறித்து போக்குவரத்து துணை போலீஸ் கமிஷனர் மதிவாணன் கூறியதாவது:- கோவை மாநகரில் போக்குவரத்து நெரிசலை குறைக்க சிக்னல்களை அகற்றிவிட்டு ரவுண்டானா அமைக்கப்பட்டு வருகிறது. அது பயனளிக்கும் வகையில் உள்ளது. மேலும் சிங்கநல்லூர் சிக்னலிலும் போக்குவரத்து நெரிசல்களை குறைக்க ரவுண்டானா அமைக்காமல் சோதனை முயற்சியாக போக்குவரத்தில் மாற்றம் கொண்டு வரப்பட்டுள்ளது. அதன்படி ஒண்டிப்புதூரில் இருந்து சிங்காநல்லூர் பஸ் நிலையத்துக்கு செல்லும் வாகனங்கள் வலது புறம் திரும்ப முடியாது . அந்த வாகனங்கள் நேராக உழவர் சந்தை அருகே சென்று யூடேர்ன்’திரும்பி சிங்காநல்லூர் பஸ் நிலையத்துக்கு வரலாம். அது போன்று வெள்ளலூர் இருந்து சிங்காநல்லூர் பஸ் நிலையம் செல்லும் வாகனங்கள் அதேபோல இடது புறமாக திரும்பி உழவு சந்தை அருகே ” யூ டேர்ன்”செய்து செல்லலாம். சிங்காநல்லூர் பஸ் நிலையத்தில் இருந்து வலது புறமாக ராமநாதபுரம் நோக்கி செல்லும் வாகனங்கள் இடது புறமாக திரும்பி சிறிது தூரம் சென்று யூ டேர்ன் எடுத்து திரும்பி செல்லலாம். அதுவே திருச்சி சாலையில் நேராக செல்லும் வாகனங்கள் வழக்கம் போல் செல்லலாம் .இதன் மூலம் போக்குவரத்து நெரிசல் வெகுவாக குறையும். தற்போது நேற்று முதல் அங்கு சோதனை ஓட்டம் தொடங்கியுள்ளது. அதை வாகன ஓட்டிகள் முறையாக கடைபிடிக்க வேண்டும். இவ்வாறு அவர் கூறினார்..